متحمسين كالعادة نشارككم آخر الأخبار اللي تهمكم: من مقطع عفوي رقّى موظفة لمديرة فرع، لتحديثات مواعيد الفعاليات العالمية بالمملكة، ومن روضة خريم اللي تصدرت الترند بصورة تاريخية، وجمال الهايكنج الليلي تحت النجوم، وصولاً لنقاشات الرياض عن الذكاء الاصطناعي اللي بيغير شكل الإعلام

NEWS

من فكرة عفوية لمقطع ترند.. كيف صارت الموظفة مديرة فرع؟

الإخلاص بالشغل واللمسة الإبداعية ممكن تفتح لك أبواب ما كنت تتخيلها وتغير حياتك في يوم وليلة

وش السالفة؟ 

القصة بدأت من موظفة عادية تحب تصور مقاطع بسيطة وفي يوم صورت طريقة جديدة ومختلفة لأكل الرول والمقطع كان عفوي جداً بس انتشر بشكل كبير وصارت الطريقة ترند والناس بدت تقلدها التفاعل كان واضح واهتمام الناس بالطريقة الجديدة خلى الكثير يصير عنده فضول يجربها خصوصاً بعد الانتشار الواسع للمقطع

ثمرة الإخلاص بالعمل

اللي صار بعدها إن الإدارة لاحظت التفاعل الكبير على فكرتها وقرروا يعتمدون طريقتها رسمياً داخل الفروع ومو بس كذا بل تمت ترقيتها إلى مديرة فرع وأعطوها مكافأة خاصة ومع كل هذا الانتشار بان شعور الفخر والدعم لها بشكل واضح خصوصاً إنها بدأت بفكرة بسيطة وقدرت توصل لهالمرحلة

💡 الخلاصة

الإبداع ما يحتاج تعقيد وأحياناً فكرة بسيطة ومقطع عفوي يكونون هم المفتاح لقصة نجاح غير متوقعة وتغيير كبير في مسيرتك المهنية

NEWS

تغيير مواعيد الفعاليات العالمية بالمملكة.. سلامة الجميع أولاً 📅🛡️

السعودية دايم تثبت إنها وجهة عالمية لأضخم الفعاليات بس في نفس الوقت أمن وسلامة زوارها والمشاركين هي الأولوية القصوى اللي ما فيها نقاش

وش السالفة؟

مؤخراً وبسبب الاحتياطات الأمنية في المنطقة قرر المنظمين تعديل مواعيد كم فعالية عالمية كبرى والموضوع مجرد إجراءات احترازية لضمان سلامة الجميع وتغيير وقت لعدد بسيط من التجمعات الدولية أبرز الفعاليات اللي تأثرت هي سباق جائزة السعودية الكبرى للفورمولا 1 اللي تم إلغاء نسخته الحالية بالتزامن مع سباق البحرين بسبب الظروف الأمنية الإقليمية وكذلك قرعة كأس آسيا في الرياض اللي تم تأجيل موعد حفلها والمنظمين أكدوا إن القرار جاء من باب الحيطة ومراقبة الأوضاع في المنطقة

ليش تم التعديل؟🤔

 لما تزيد المخاطر الأمنية في أي منطقة المنظمات الدولية أحياناً تغير جداولها عشان تحمي اللاعبين والموظفين والزوار اللي جايين من كل مكان وهذا إجراء طبيعي يصير في كل دول العالم لما يتعلق الموضوع بفعاليات فيها زحام وسفر دولي كبير

💡 الخلاصة

حالياً بعض المواعيد تغيرت لكن السعودية باقية وبقوة كوجهة عالمية لأضخم الفعاليات والتجهيزات للبطولات والمهرجانات الجاية مستمرة زي ما خطط لها والوعد قدام

NEWS

روضة خريم تتصدر الترند.. طبيعة ساحرة وذكريات تاريخية 🌿📸

الطبيعة عندنا لها سحر خاص ولما تمتزج هالخضار مع صور وذكريات من الماضي يصير المكان وجهة تسر الخاطر وتفتح النفس

وش السالفة؟ 

روضة خريم بين بساطها الأخضر والورد صارت الوجهة المفضلة لكل اللي يدورون الهدوء أو اللقطة المثالية لمحتواهم لأن المكان حرفياً يتكلم جمال واللي زاد من تفاعل الناس وتصدرها الترند هالأيام

لقطة تاريخية نادرة تجمع خادم الحرمين الشريفين الملك سلمان بن عبدالعزيز مع المغفور لهما الملك فهد والملك عبدالله -رحمهم الله- في لحظات استرخاء وسط طبيعة خريم الساحرة

الخلاصة 🌟

روضة خريم مو بس مساحة خضراء هي مكان يحمل ذكريات وتاريخ وطبيعة تجبرك توثقها وتعيش تفاصيلها وتستمتع بهدوئها

SHARABLES

…بعض المواضيع اللي ممكن تهمك

عريس يغوص بالبشت

ترند البرازيل وصل السعودية

معلم يحضر طلابه بالباركود

عامر والطفلة سارة

NEWS

الهايكنج الليلي.. أماكن خيالية للمشي تحت النجوم بالسعودية 🌌🥾

إذا كنت تحسب إن الهايكنج للمشي الصباحي بس فأنت فاتك الكثير لأن مع اعتدال الأجواء بدأت موضة الهايكنج الليلي تجتاح مجتمع المغامرين في السعودية

وش السالفة؟ 

تخيل تمشي بين الجبال والهدوء يحيط بك وفوقك سماء مليانة نجوم ما تقدر تشوفها في زحمة المدينة وعشان تعيش هالتجربة جهزنا لك قائمة بأفضل الوجهات اللي تعطيك تجربة تأمل ومغامرة في نفس الوقت

أماكن الهايكنج الليلي الخيالية

جبل نهاية العالم في الرياض 

الكل يعرفه بالنهار بس بالليل المكان يتحول لقطعة من الفضاء والمشي هناك والقمر مكتمل يخليك تحس إنك في كوكب ثاني ولا تنسى تجيب معك شاهي جمر عشان تكتمل السهرة فوق القمة

جبال الهدا والشفا في الطائف

 ريحة الورد الطائفي مع برودة الليل وضباب خفيف تعيشك واقع أجمل من الخيال في الهايكنج الليلي والمسارات مجهزة والمنظر من فوق يخليك تنسى كل ضغوط الأسبوع

وادي الديسة في تبوك

 هذا المكان سحر بالنهار وبستان نجوم بالليل والجبال الشاهقة تحميك من الرياح وتخليك تستمتع بصمت الطبيعة ونصيحة خذ معك كاميرا احترافية لأن درب التبانة يظهر بوضوح هناك

جبال أجا في حائل 

ما نقدر نتكلم عن الجبال وما نبدأ من حائل لأن جبال أجا بالليل لها هيبة ثانية والتشكيلات الصخرية الضخمة مع ضوء القمر تعطيك شعور إنك في قلب أسطورة قديمة والمنظر من فوق يخليك تشوف أضواء المدينة وكأنها لوحة فنية

مسارات العلا الجبلية 

العلا دايم تبهرنا والهايكنج الليلي فيها بين الصخور اللي تشكلت عبر آلاف السنين يعطيك شعور تاريخي وروحاني عجيب وغالباً تنتهي الرحلة بجلسة عربية وقهوة سعودية أصيلة تحت ضوء القمر

💡 الخلاصة

نصيحة لوفن لا تنسى الكشاف الرأسي وجاكيت خفيف لأن الجو فوق يقلب بسرعة وأهم شيء خذ معك شاهي جمر وانسى العالم وعيش اللحظة

NEWS

 الذكاء الاصطناعي يغير شكل الإعلام.. والرياض تحتضن النقاش الكبير! 🤖📰

التقنية جالسة تتطور بسرعة خيالية والذكاء الاصطناعي دخل في كل تفاصيل حياتنا واليوم وصل للإعلام وصناعة المحتوى عشان يقلب الموازين

وش السالفة؟ 

الرياض تستضيف المؤتمر الإعلامي العاشر عشان تناقش كيف الذكاء الاصطناعي قاعد يعيد تشكيل عالم الإعلام من الصحافة وصناعة المحتوى إلى طريقة سرد القصص على الإنترنت المؤتمر بيستمر يومين ويبدأ في 7 أبريل وبيجمع نخبة من خبراء الإعلام والأكاديميين والمختصين بالتقنية بتنظيم من الجمعية السعودية للإعلام والاتصال وبرعاية كريمة من جامعة الملك سعود وأبرز النقاشات بتركز على مستقبل الصحافة في عصر الذكاء الاصطناعي وكيف الجامعات تقدر تجهز طلاب الإعلام للمستقبل ودور التقنية في غرف الأخبار وهل فعلاً بتحقق أرباح للشركات الإعلامية

هل بياخذ وظايف الإعلاميين؟ 🤔

 على حسب كلام رئيس الجمعية الدكتور علي بن ضميان الذكاء الاصطناعي ما عاد أداة نقدر نأجلها أو نعتبرها ترف أكاديمي والإعلاميين اللي يتجاهلونه اليوم ممكن يواجهون صعوبة في البقاء والمنافسة بالمجال خلال كم سنة بس هل هذا يعني إنه بياخذ وظايفهم الجواب مو بالضبط لأن المؤتمر بيركز على وش المهام اللي يقدر الذكاء الاصطناعي يسويها بشكل آلي ووش الأدوار اللي باقي تحتاج إبداع وحكم بشري وكيف التقنية تقدر تساعد الصحفيين وصناع المحتوى مو تستبدلهم

💡 الخلاصة

الهدف الأساسي من هالتجمع هو بناء مستقبل متوازن يجمع بين الإعلام والتقنية عشان نطلع بمحتوى أذكى وأسرع وبلمسة إبداع بشرية ما تتكرر

تابع أفضل المقابلات والقصص المؤثرة على لوڤن شو🎥