- Lovin Saudi | لوڤن السعودية
- Posts
- ...
...
Augustus Media FZ LLC
February 19, 2026
🙏🏻💚 أهلاً بك في نشرتنا الأسبوعية من لوڤن السعودية
أخبار رهيبة تنتظرك … جاهز؟🇸🇦
متحمسين كالعادة نشارككم آخر الأخبار التي تهمكم وتصنع الفرق؛ من شرارة بخور بغت تحرق قصر باور، لقائمة مسلسلات رمضان المنتظرة، ومن أكبر نفضة بصالات مطار الرياض، لجدارية بتنشاف من الفضاء، وصولاً لعرضة 'السعودي' جون باقانو
هالأسبوع مليان قصص تحسّها قبل ما تقراها
NEWS
من شرارة بخور بسيطه بدا هذا الحريق
في لحظة وحدة كان ممكن نفقد “قصر باور” حريق في مقر الفريق! بس الحمد لله، ربي ستر ولطف
وش السالفة؟
السالفة كلها بدأت بشيء بسيط وما يجي على البال كنا نحسب الموضوع كبير، لكن اتضح إن السبب كان مبخرة بخور كانت موجودة داخل الغرفة، ومن سوء الحظ طارت منها شرارة صغيرة، وهالشرارة كانت كفيلة إنها تشعل فتيل الرعب في المكان
فزعة أبطال الدفاع المدني في الموعد
وفي عز اللحظة الحرجة، حضر الأمان! ما مر وقت إلا وأبطال الدفاع المدني يلبون النداء، استجابتهم كانت سريعة بشكل ما يتصدق
رجال الدفاع المدني تعاملوا مع الحريق باحترافية عالية جداً، وسيطروا على الوضع في وقت قياسي، والخبر الأجمل؟ إنهم قدروا يوقفون النار ويحاصرونها قبل ما توصل للأجهزة الغالية، وغرف التصوير، والـ سيت أب
💡 الخلاصة
الحمد لله على السلامة المهم في النهاية إن “الحديد يتعوض”، وسلامة الشباب هي الأهم الموقف عدى على خير، والأضرار كانت محدودة بفضل الله ثم سرعة استجابة الدفاع المدني
NEWS
أكبر تغيير من 40 سنة
الرياض تكبر وتتطور بسرعة خيالية، وكان لازم مطارنا اللي ودعنا واستقبلنا فيه حبايبنا لأكثر من 40 سنة يواكب هالنقلة التاريخية
وش السالفة؟
الشغل بدأ.. والوجهة صارت واضحة 🚀
عشان نثبت لكم إن الشغل على الأرض بدأ وما هو بس كلام، قبل كم يوم (تحديداً 16 و17 فبراير)، خلصنا من أول وأهم خطوة. صالة 1 و 2 صارت مخصصة بالكامل للرحلات الدولية للناقلات الوطنية (زي الخطوط السعودية وطيران ناس وطيران الرياض وغيرها)🇸🇦 يعني إذا رحلتك دولية على خطوطنا، صالتك صارت معروفة ومحددة، والخدمة بتصير أسرع وأرتب لك
خريطة الصالات الجديدة: وداعاً للزحمة واللخبطة🗺️
طيب وباقي الصالات وش بيصير فيها؟ التغيير شمل المطار كله عشان تترتب الأمور لصالحنا، وهذا التوزيع الجديد
صالة 5 (للعالمية): هذي الصالة بتودع الرحلات الداخلية قريب، وبتصير مخصصة بالكامل للرحلات الدولية لشركات الطيران الأجنبية 🌍
صالتين 3 و 4 (لرحلاتنا الداخلية): بتصير هي القلب النابض والمركز الجديد والحصري لكل الرحلات الداخلية مساحة أكبر، وتركيز أعلى لخدمة المسافرين بين مدن المملكة
وش بنستفيد من هذي "المناقلة"؟ 🤔
:الموضوع مو بس تغيير أماكن، الهدف الأساسي هو راحتك! التوزيع الذكي هذا بيعطينا
زحمة أقل: لأن الطاقة الاستيعابية بتزيد وبتاخذ راحتك أكثر بالمطار
تنقل أسهل: اللي عنده رحلة مواصلة (ترانزيت) بيقدر يتنقل بين الصالات بسهولة وسرعة
وقت انتظار أقل: ما عاد فيه طوابير طويلة عند الجوازات أو منصات الخدمة
باختصار: بنعيش تجربة سفر تليق فينا وتروّق البال ✨
الخلاصة 🌟
عشان ما تتوه وتروح صالة غلط، خلك دايم على تواصل مع خطوط الطيران أو استخدم "الواتساب التفاعلي"(920020090) لمطار الملك خالد عشان تعرف صالتك وبوابتك في ثواني وتروّق بالك
NEWS
شيك على بياض.. ولوحة تشوفها من الفضاء
الفن في السعودية جالس ياخذ أبعاد جديدة، بس هالمرة البعد حرفياً ممكن يوصل للفضاء
وش السالفة؟
الفنان الإسباني-الأمريكي المعاصر "دومينغو زاباتا"، المعروف بأعماله الجريئة والعملاقة، صرّح لصحيفة "نيويورك بوست" إنه بيسوي جدارية ضخمة عندنا مساحتها 50 ألف متر مربع زاباتا قال إن المشروع بياخذ من 4 إلى 6 سنوات، وإن الميزانية "مفتوحة" والجدارية من كبرها ممكن تنشاف من الفضاء بس لحظة، لازم نوضح إن لحد الآن ما صدر أي بيان رسمي من وزارة الثقافة يأكد تفاصيل المشروع أو سالفة "الشيك المفتوح"، وكل الكلام مبني على تصريحات الفنان والتقارير الأجنبية
💡 الخلاصة
مشروع لو تم بيكون نقلة خيالية في مشهدنا الفني والثقافي، وبننتظر الإعلان الرسمي عشان نعرف كل التفاصيل اللي بتزين أرضنا
SHARABLES
…بعض المواضيع اللي ممكن تهمك
NEWS
العقل المدبر لأجمل وجهاتنا السياحية
من ساحل بكر إلى وجهة سياحية عالمية، قصة نجاح بطلها صار اليوم واحد مننا وفينا
وش السالفة؟
جون باقانو، الرئيس التنفيذي لمجموعة "البحر الأحمر" والعقل المدبر لتطوير أهم الوجهات السياحية في المملكة، صدرت الموافقة السامية على منحه الجنسية السعودية تقديراً لخبراته وإسهاماته الكبيرة باقانو ما اكتفى بتغيير معايير السياحة العالمية وبس، بل شفناه قبل أسبوع يحتفل بيوم التأسيس لأول مرة في وجهة البحر الأحمر وهو لابس الزي السعودي الكامل ويأدي العرضة السعودية بكل فخر تأثيره الكبير ساهم في تحويل رؤية المملكة لواقع ملموس في قطاع السياحة والاستدامة وخلى مشروع البحر الأحمر وجهة طموحة تنافس عالمياً
💡 الخلاصة
جون باقانو أثبت إن الانتماء مو بس بالولادة، بل بالشغف والعمل والإنجاز اللي يخدم هالوطن.. نورتنا يا أبو باقانو
NEWS
جهزوا القائمة من الحين
🏚️ مسلسل حي الجرادية
دراما شعبية تدخلنا أجواء الحارات القديمة…
رجل يرجع لحيّه بعد غياب طويل، لكن رجعته ما هي عادية ماضي ثقيل، حسابات قديمة، وأسرار مدفونة تبدأ تنكشف وحدة وراء الثانية والعلاقات تتقلب، والهدوء ينقلب مواجهة
يوميات رجل متزوج 2
بعد “يوميات رجل عانس” نعيش الحياة بعد الزواج! بطولة إبراهيم الحجاج
كوميديا من قلب المواقف اليومية بس هالمرة المشاكل بين زوج وزوجته، والضحك مضمون
🎭 شارع الأعشى 2
الموسم الأول انتهى بصدمة قلبت كل الموازين والحين الجزء الثاني يرجع يكمل الأحداث، ويكشف مصير الشخصيات بعد التحولات الكبيرة
😎 شباب البومب 14
إي نعم… 14 ولسه الطاقة موجودة
عامر والشلة راجعين بمواقف جديدة من الحياة اليومية، كوميديا خفيفة تناسب جلسة بعد الفطور
جاك العلم 3
أبو صامل وأم صامل راجعين يكملون سوالفهم ومشاكلهم اليومية. مواقف بسيطة… بس تنتهي بفوضى تضحك
🎬 مسلسل آخر كلام
عمل جديد بفكرة مختلفة
كل حلقة تناقش قضية أو موضوع اجتماعي بأسلوب خفيف، مع لمسة كوميديا تخلي الرسالة توصل بدون تعقيد
رمضان 2026 شكله واعد بكل المقاييس
دراما تشدّك، وكوميديا تخفف عليك بعد يوم طويل، وقصص قريبة من القلب تعيش معنا ليلة وراء ليلة
حضّروا الجلسات، رتّبوا المواعيد
واضح إن الشاشة هالسنة ما فيها وقت للملل 🌙📺
