متحمسين كالعادة نشارككم آخر الأخبار اللي تهمكم: من الدخول للسعودية بدون جواز عبر طريق مكة، لبصمة حياة الفهد بذاكرتنا، ومن ابتكار الكفيفات اللي تصدر المشهد، لتألق سعود عبدالحميد بفرنسا، وصولاً للسعودية اللي صارت السند الجوي الأول للخليج

NEWS

الدخول للسعودية بدون جواز؟ مبادرة "طريق مكة" تغير تجربة الحجاج ✈️🕋

تخيل إنك تسافر لدولة ثانية وأول ما تنزل من الطيارة تطلع دايركت تركب الباص اللي يوديك لفندقك بدون ما توقف في طوابير الجوازات أو تنتظر عند سير العفش هذا واقع يعيشونه ضيوف الرحمن بفضل جهود المملكة

وش السالفة؟ 

السر وراء هالنقلة النوعية يكمن في مبادرة طريق مكة اللي فكرتها باختصار إنها تخلص كل إجراءات الحاج وهو في بلده عشان تختصر الزحمة والانتظار وكل شيء يخلص في صالات مخصصة قبل صعود الطيارة من إصدار التأشيرات وأخذ البصمة لإنهاء إجراءات الجوازات بالكامل وترميز وفرز العفش وتوجيهه لمقار سكنهم وأول ما يوصل الحاج ينتقل دايركت للحافلات وعفشه يوصل لغرفته

أرقام تشرّف 📊 

نجاح هالمبادرة مو مجرد كلام لأنها دخلت عامها الثامن بنجاح باهر وخدمت أكثر من 1.25 مليون حاج ووفرت لهم تجربة استثنائية خالية من التعب وتتنفذ حالياً في 10 دول حول العالم مثل باكستان وماليزيا وإندونيسيا وغيرها

💡 الخلاصة

مبادرة طريق مكة هي انعكاس حقيقي للنموذج السعودي العالمي في رفع جودة خدمات الحج وتثبت للعالم كله إن خدمة ضيوف الرحمن هي شرف تتسابق عليه كل قطاعات المملكة 

NEWS

غابت شمس الفن.. وداعية يا يمه💔🎬

كانت معنا في كل "صالة" بيت سعودي، من أيام "خالتي قماشة" اللي جمعتنا حول التلفزيون، لين آخر أعمالها.. حياة الفهد ما كانت مجرد ممثلة، كانت هي "أفكار أمي" في الجلسة، وجزء أصيل من ذكريات جيل الطيبين

وش السالفة؟

اليوم ودعنا قامة فنية كبيرة، سيدة الشاشة الخليجية "أم سوزان" من فينا ما ضحك من قلبه مع رقية وسبيكة؟ ومن ما تأثر بدموعها في أدوارها التراجيدية؟ هي وسعاد عبدالله شكلوا جزء من هويتنا الفنية، ومسلسلاتهم كانت فرض عين في بيوتنا السعودية والخليجية، وتابعتها أجيال ورا أجيال

مكانة غالية وتقدير استثنائي 🌟

حب السعوديين لأم سوزان ماله حدود، وما كان صدفة إن هيئة الترفيه اختارتها عشان تكون وجه موسم الرياض؛ لأنهم يعرفون قدرها بقلب كل سعودي وتأثيرها العابر للحدود رحلت وتركت ورآها إرث يدرّس، ومئات الساعات من الفرح والدموع اللي شاركتنا فيها طوال مسيرتها العظيمة

💡 الخلاصة

رحلت سيدة الشاشة، لكن أثرها ما ينمحي وصوتها بيبقى يتردد في كل بيت الله يرحمك يا أم سوزان، ويغفر لك، وعزانا لكل محبينك في المملكة والخليج

NEWS

ابتكار "الكفيفات" القصة اللي شغلت السوشل ميديا 

المواهب السعودية دايم تبهرنا بأفكار خارج الصندوق، واليوم عندنا ابتكار تقني (جهاز وتطبيق) مصمم خصيصاً لمساعدة الكفيفات في مراقبة الدورة الشهرية فكرة إنسانية ذكية خلت الجميع يتكلم عنها وعن أهميتها

وش السالفة؟ 

القصة بدأت بصورة انتشرت للوحة تعريفية في ممرات الجامعة، والكل أعجب بالفكرة لكن صار فيه "سوء فهم" وجدل بسبب غياب اسم (رغد) صاحبة الفكرة الأساسية من اللوحة الموضوع أخذ صدى واسع في السوشل ميديا، وطلعت رغد ووضحت كامل التفاصيل، وبالمقابل رهف غردت بتغريدة شكر للناس وذكرت فيها شريكتها رغد، وأكدوا إن العمل مشترك وموثق باسمهم الثنتين

مشروع قديم وإنجازات موثقة 🧠

اللي كثير ما يعرفونه إن هذا الابتكار مو وليد اليوم! البنات شغالين عليه بتفانٍ من فترة، وسبق وشاركوا فيه في "هكاثون" وحققوا فيه المركز الثالث بجدارة. والأهم من كذا، إن المشروع رسمي وموثق، وحصلوا فيه على براءة اختراع في عام 2025، لكن الضوء تسلط عليه بشكل أكبر مؤخراً بعد انتشار لوحة الجامعة

الخلاصة 🌟

الحلو في الموضوع هو سرعة التفاعل؛ الجامعة بمجرد ما وصلتها الملاحظات تجاوبت فوراً وشالت اللوحة التعريفية، والهدف هو تعديلها وإضافة أسماء "بطلات الابتكار" رغد ورهف مع بعض خطوة تحسب للجامعة في تقدير بناتها وحفظ حقوقهم، وفخورين جداً بهالنماذج اللي ترفع الرأس  

SHARABLES

…أشياء ممكن تهمك

بركة الجميمة من العصر العباسي

الرياض الحين وقبل 10 سنوات 

كيف السعوديين يستغلون موسم الامطار

شباب يجددون سيارات قديمة

NEWS

بعد غياب 28 عام.. سعود عبدالحميد يضع فريقه على أبواب لقب تاريخي ⚽🇫🇷

يا فخرنا ويا كبر حظنا بعيالنا المحترفين النجم السعودي سعود عبدالحميد جالس يكتب سطور من ذهب في الملاعب الأوروبية وتحديداً الملاعب الفرنسية اللي صارت تردد اسمه بكل إعجاب وفخر

وش السالفة؟ 

في مباراة نصف نهائي كأس فرنسا ولدنا قاد فريقه لانس لاكتساح نادي تولوز بنتيجة عريضة 4-1 وبصمته كانت واضحة وحاسمة في وصول فريقه للمباراة النهائية كاسرين عقدة وغياب طويل دام 28 عام وسعود أبدع وصنع هدفين حاسمة بطريقة خرافية وهالتألق خلاه ياخذ أعلى تقييم بالمباراة 9.1 من 10 من موقع الإحصائيات العالمي سوفاسكور

محبة وهتافات تهز الملعب 🗣️

الأجمل من الأرقام هو الأثر اللي تركه سعود بمحبة زملائه اللي احتفلوا فيه بشكل هستيري كبطل للمباراة والمشهد اللي يجيب القشعريرة هو حب وفخر الجماهير الفرنسية اللي رددت اسمه بصوت واحد وبعد إطلاق الصافرة نزلت الجماهير لأرض الملعب تحتفل بشكل جنوني بهالإنجاز

💡 الخلاصة

فريق لانس بقيادة نجمنا السعودي صار على بعد خطوة وحدة بس من تحقيق اللقب المفقود وفالنا نشوفه رافع الكاس ومكمل هالمسيرة التاريخية اللي ترفع راس كل سعودي 

NEWS

السعودية السند الجوي الأول لرحلات الخليج

الصور واللقطات اللي انتشرت لطيارات دول الخليج وهي متجمعة في الدمام مو مجرد صدفة، وراها قصة تثبت إن السعودية هي السند الجوي في المنطقة

وش السالفة؟ 

في الفترة الأخيرة، ومع التحديات اللي واجهتها بعض المطارات في المنطقة، تحولت السعودية حرفيًا لـ “ملاذ جوي” آمن مطار الملك فهد الدولي بالدمام استقبل رحلات لشركات طيران خليجية كثيرة، عشان يضمن إن حركة السفر ما توقف ولا يتعطلون المسافرين

أكثر من مجرد استقبال رحلات! 🛫

 الموضوع تطور وصار فيه شغل مرتب شركات طيران الخليجية بدأت تشغل رحلاتها فعلياً من مطاراتنا مثل الدمام وحتى القيصومة عشان تضمن استمرار رحلات الركاب وعمليات الشحن بدون توقف يعني السعودية اليوم ما عاد بس تخدم نفسها وتطور مطاراتها، صارت هي المحرك اللي يسند حركة الطيران في الخليج كامل

ليش هذا الكلام مهم؟ 🇸🇦

 لأنه يثبت جاهزية البنية التحتية لمطاراتنا وقدرتها على استيعاب ضغط مفاجئ، والأهم من كذا يوضح دور المملكة كقائد ومحور أساسي في المنطقة، حتى في أصعب الظروف الجوية أو التقنية

💡 الخلاصة

لما تضيق الأمور، مطاراتنا هي المكان الآمن.. ومطار الدمام اليوم أثبت إنه مو بس بوابة للمنطقة الشرقية، بل هو الركيزة اللي تعتمد عليها سماء الخليج وقت الأزمات

تابع أفضل المقابلات والقصص المؤثرة على لوڤن شو🎥