- Lovin Saudi | لوڤن السعودية
- Posts
- ...
...
Augustus Media FZ LLC
April 20, 2026
🙏🏻💚 أهلاً بك في نشرتنا الأسبوعية من لوڤن السعودية
أخبار رهيبة تنتظرك … جاهز؟🇸🇦
متحمسين كالعادة نشارككم آخر الأخبار اللي تهمكم: من الدخول للحرم بالهوية، لقصة 'مرام' اللي حولت معاناة والدها لاختراع عالمي، ومن ملعب أرامكو اللي بيغير خريطة ملاعبنا، لفزعة عائلة سعودية مع عاملتهم، وصولاً لهبة الفريدو إسبريسو
NEWS
تنظيم لسلامة وراحة الحجاج
إذا كنت ناوي تروح مكة الفترة الجاية أكيد سمعت الكلام اللي قاعد ينتشر إنك تقدر تدخل الحرم بالهوية الوطنية إلى يوم 15 ذي القعدة بس هل هذا الكلام صحيح؟
وش السالفة؟
كل سنة مع اقتراب موسم الحج الجهات المختصة في السعودية تبدأ تطبق تنظيمات صارمة للدخول إلى مكة المكرمة عشان إدارة الزحام وضمان سلامة الحجاج والمرحلة الحساسة تبدأ بعد 15 ذي القعدة بحيث يمنع دخول غير المصرح لهم إلى مكة ويتم تفعيل نقاط تفتيش أقوى مع الاعتماد على تطبيقات مثل نسك وأبشر والكلام يشمل حتى المقيمين داخل مكة بحيث يحتاجون لإثبات
هل الخبر رسمي 100%؟ 🤔
عادة هذي التفاصيل تكون جزء من تنظيمات موسمية تصدر من الجهات الأمنية ووزارة الداخلية لكن الصيغة المنتشرة حاليًا تحتاج متابعة مستمرة لأنها تتحدث وتتغير حسب الموسم
💡 الخلاصة
نعم الدخول بالهوية متاح إلى 15 ذي القعدة وبعد هذا التاريخ التصاريح تصير إلزامية والهدف تنظيم الحج مو التضييق وأهم شيء لا تعتمد على الكلام المتداول فقط وتابع التحديثات الرسمية
NEWS
من ألم السكري إلى إنجازات ترفع الرأس
الألم أحيانًا يكون هو الشرارة، وهذا اللي صار مع مرام يوم خلت معاناة والدها مع السكري دافع لها عشان تدخل عالم الأبحاث والمعامل
وش السالفة؟
مرام بدأت رحلتها وهي تحلم بابتكار حلول تساعد مرضى السكري وتخفف عنهم، وهالدافع الإنساني هو اللي قادها للتخصص في الهندسة والبحث العلمي ومع إن بداياتها كانت مرتبطة بمشاريع صحية إلا إن تميزها الحقيقي والجوائز اللي رفعت فيها اسم المملكة كانت في مجال تقني دقيق جدًا
وش الاختراع اللي جاب لها الذهب؟ 🧪
مرام أذهلت العالم بابتكار في "معالجة مياه الصرف الصحي" استخدمت تقنية النانو ومادة حيوية (الشيتوزان) عشان تطور مركب ذكي ينقي الموية من الأصباغ والسموم الضارة هذا الاختراع هو اللي جاب لها الميدالية الذهبية في "آيتكس" بماليزيا وجائزة أقوى اختراع من جامعة "يال" الأمريكية
طموح يعانق السماء 🌟
بنت جازان اللي بدأت من "ألم" بسيط، صارت اليوم نموذج للمخترعة اللي تخدم البيئة والعلم وما وقفت طموحاتها هنا، بل تطمح مستقبلاً لخدمة قطاع الصحة في وطننا، وتوجت مسيرتها بتكريم من سمو أمير منطقة جازان بجائزة منافس 2025
💡 الخلاصة
قصة مرام تعلمنا إن الهدف النبيل ممكن يفتح لك أبواب في مجالات ما كنت تتخيلها. بدأت تبي تساعد أبوها، وانتهت بابتكار عالمي يحمي البيئة ويخدم البشرية كلها👌
NEWS
تحفة رياضية عالمية بالشرقية
المشاريع الضخمة في المملكة جالسة ترسم مستقبل مبهر للرياضة وملعب أرامكو في الخبر يعتبر نقلة نوعية راح تغير خريطة الملاعب عندنا
وش السالفة؟
قبل كم سنة كانت الأرض مجرد مساحة فاضية في الخبر واليوم صارت مشروع ضخم يتشكل عشان يكون الملعب الرئيسي لنادي القادسية بطاقة استيعابية تقارب 47 ألف مشجع والمشروع بدأ فعليًا في 2024 وفي سنتين بس صارت ملامحه واضحة للكل والهدف يتجاوز الملعب بحيث يكون وجهة رياضية وترفيهية متكاملة تخدم الشرقية وتنافس عالميًا
مشروع عالمي وتقنيات ذكية 🧠
المشروع دخل مرحلة الحسم بعد إطلاق شركة "ملعب أرامكو" رسميًا لإدارته وتشغيله وهالملعب مو بس للقادسية لأن فيه خطط إنه بيستضيف كأس آسيا 2027 وكأس العالم 2034 واللي يميزه هو التفاصيل التقنية المتقدمة مثل النظام الذكي لإدارة ري أرضية الملعب وتقنيات الإضاءة الحديثة والبنية التحتية للاستدامة
الخلاصة 🌟
بعد استحواذ أرامكو على القادسية واضح التوجه لتحويله لنادي منافس عالمي ووجود ملعب بهالحجم والتقنيات يعطيه دفعة قوية والشرقية على موعد مع أيقونة من الأفضل في السعودية
SHARABLES
…أشياء ممكن تهمك
NEWS
خير مجتمعنا ماله حدود
جبر الخواطر ماله ثمن والعطاء الحقيقي هو اللي يغير حياة الناس وهالقصة تثبت لنا إن الخير متأصل في قلوبنا ومجتمعنا
وش السالفة؟
القصة بدأت يوم جات العاملة وطلبت من العائلة إنها تترك الشغل وتسافر لبلدها نهائيًا والسبب مو تعب من الشغل بل عشان توقف مع بنتها وتدعمها بدراستها الجامعية وتوفر لها المصاريف وهنا جاء الرد اللي ما تتوقعه العاملة أبداً حيث العائلة عيوا يخلونها تسافر وبدل ما يوافقون قرروا بقلب واحد إنهم يتكفلون برسوم جامعة بنتها كاملة
تسابق على الخير 🏃♂️
الموضوع ما وقف على الدفع وبس أفراد العائلة صاروا يتسابقون ويتنافسون بينهم وكل واحد يدور الأجر ويبي هو اللي يسبق ويدفع رسوم الترم قبل الثاني في مشهد يعكس أسمى معاني التكافل والمحبة واليوم بفضل الله ثم بوقفة العائلة تخرجت البنت رسميًا وحققت حلمها وحلم أمها
💡 الخلاصة
هالقصة اللطيفة تبقى شاهدة على إن العطاء هو اللي يزرع الفرحة بالقلوب مهما كانت المسافات بعيدة ويغير حياة الناس للأفضل
NEWS
الهبة اللي زاحمت الآيس دريب
كوب الإسبريسو الحار اللي متعودين عليه، صار ينخفق ويتحول لمشروب بارد برغوة مخملية وصار خيار جديد للي يدورون تغيير في الرياض
وش السالفة؟
لو تلاحظ هالأيام، أغلب اللي يتقهوون طايحين في مشروب بارد شكله يفتح النفس وفوقه رغوة كثيفة هذا هو الـ "الفريدو إسبريسو"، المشروب اللي أخذ الإسبريسو البسيط وحوله لتحفة باردة ومنعشة، وصار هو الخيار الأول للروقان في يوم كل احد يحب القهوة عندنا
كيف تتسوى هذي الرغوة؟
كلمة "الفريدو" أصلها إيطالي ومعناها "بارد"، لكن اليونانيين هم اللي ضبطوا السالفة والموضوع فن وفيزياء يبدأ بدبل شوت إسبريسو حار ينخفق بسرعة عالية جدًا بخلاط خاص وهالحركة تدخل الهواء وتخلي زيوت القهوة الطبيعية تتحول لرغوة ثقيلة وناعمة بدون حليب بعدها ينصب هالخليط المركز فوق الثلج، ويعطيك طعم قوي ومنعش بدون إضافات تخرب النكهة
وين تلقى أطلق الفريدو في الرياض؟ 📍
هجين
مشهورين بأن محاصيل القهوة عندهم جودتها عالية والفريدو عندهم فخم ومرتب، وقدروا يوازنون بين طعم الإسبريسو القوي وبين الرغوة الناعمة اللي فوق
خطوة جمل
هذولي هم “القدامى” وأهل الخبرة في القهوة المختصة عندنا طريقتهم في تحضير الفريدو دقيقة، عشان يضمنون إن طعم القهوة الأصلي يبقى واضح وما يختفي بسبب الخفق الكثير
كاكتي
إذا يهمك الكوب اللي شكله “كشخة” ويطلع بطل في التصوير، كاكتي هو خيارك الفريدو حقهم يتميز بأن طبقاته واضحة ومنظره جميل، وطعمه خفيف وسلس
شوتس
خيارك الأول إذا تبي قهوة ممتازة وسريعة يتميزون بأن مستواهم دايم “ثابت”، يعني في أي فرع تروح له بالرياض بتلقى نفس الطعم اللذيذ
💡 الخلاصة
الموضوع مو مجرد ثلج وقهوة، الفريدو فن دمج بين قوة الإسبريسو وانتعاش الصيف بدون ما تتنازل عن نكهة القهوة الأصلية المشروب أثبت نفسه وصار أساسي، والسؤال: بتجرب الهبة ولا بتبقى صامل ووافي للفي سكستي 👌
