متحمسين نشارككم أخبارنا الرهيبة من طوابير مولات الرياض عشان ساعة سواتش، لقيادة مصممينا للأزياء بمهرجان كان، ومن تمثيل أبو ناصر بفيلم البوليفارد، لحسم لغة التدريس بجامعة الفنون، وصولًا للوحة اللي جبرت خاطر بنت ذوي الهمم

NEWS

طوابير في مولات الرياض بس عشان ساعة سواتش

الوضع في أسواق الرياض الأيام اللي راحت كان غير طبيعي وزحمة ما شفناها من فترة طويلة والسبب مو تخفيضات بل إصدار محدود لساعة جديدة خلت الناس تجيب مخداتها وكراسيها وتكشت قدام المحلات من 2 الفجر

وش السالفة؟ 

الضجة هذي بدأت مع الإطلاق الرسمي لتعاون مفاجئ بين سواتش وأوديمار بيغيه والناس كانوا متوقعين ساعة تنلبس على المعصم مثل رويال أوك لكن سواتش فاجأت الكل بلمسة بوب ريترو وطرحتها كـ ساعة جيب بتصميم مختلف والساعة مصنوعة من خامة بايوسيراميك المبتكرة وتتميز بحركة ميكانيكية وتقدر تعلقها كسلسلة وعشان الزحام المهول المحلات حطت شرط صارم وهو البيع محدود بساعة واحدة للشخص يوميًّا عشان يسيطرون على الوضع

💡 الخلاصة

اللي صار بالرياض يثبت إن ثقافة اقتناء القطع النادرة والمحدودة صارت ترند قوي وتخلي الناس مستعدة تسهر وتخيم وهالتعاون الذكي كتب قصة جديدة بعالم التسويق

NEWS

المصممين السعوديين يقودون الفاشن في مهرجان كان العالمي

براندات ومصممينا أخذوا الفخامة السعودية لفرنسا وتركوا بصمة ما تنسى في مهرجان كان 2026! حضور مميز أثبت للعالم كله من جديد إن إبداعنا وصل للعالمية وبقوة

وش السالفة؟

السجادة الحمراء هالسنة نورت بلمسات سعودية فريدة؛ فالبداية كانت مع براند "آي كي اتش" اللي قدم الفخامة بأبهى صورها بإطلالة أنيقة للفنانة نور الغندور وظهور راقي لعارضة الأزياء عزة سليمان. وتابعت المصممة نور الظاهري هذا التألق بتصاميم ناعمة وفخمة، لبست منها الفنانة خيرية أبو لبن وعارضة الأزياء العالمية كيت أليكسيفا

إبداع يفرض نفسه

أما المصممة بلقيس القضيب قدمت إبداع يفرض نفسه من خلال فستان خيالي تميزت فيه الملهمة أليس عبد العزيز ومن أصالة الماضي، سوت المصممة وعد العقيلي صدى قوي بمجموعتها "يامال" لربيع وصيف 2026

بصمة أخيرة تخطف الأنظار 

والمشهد اكتمل بفخامة مالها مثيل من توقيع المصممة إيمان العجلان، اللي زادت النجمات لمى الكنان وميلا الزهراني رقي وأناقة لفتت كل العيون

💡 الخلاصة

من الآخر.. التواجد السعودي القوي في مهرجان كان هالسنة أثبت إن الإبداع والموضة عندنا ما تكتفي بالمحلية، بل قاعدة تصنع التميز وتلفت أنظار العالم وصنّاع الفاشن في كل مكان

NEWS

تركي آل الشيخ يمثل في فيلم البوليفارد 🎬🍿 

واضح إننا داخلين على مرحلة جديدة فعلًا بالسينما السعودية والإنتاج الضخم والتفاصيل الدقيقة تحسسك إنك داخل عالم سينمائي مختلف تمامًا عن اللي تعودنا نشوفه محليًّا

وش السالفة؟

معالي المستشار تركي آل الشيخ فاجأ المتابعين بلقطات من كواليس فيلم البوليفارد اللي يتم تصويره بالكامل داخل بوليفارد وورلد بقيادة المخرج محمد الملا واللي زاد الحماس إن تركي آل الشيخ شارك بنفسه بمشهدين داخل الفيلم دعمًا للمواهب السعودية وقصة الفيلم خيالية وتدور حول ظهور بوابة غامضة فوق البوليفارد تبدأ بعدها عوالم وأزمنة تتداخل مع الرياض بطريقة مليانة أحداث وتشويق

💡 الخلاصة

الفيلم يضم نخبة من النجوم مثل لمى الكناني ويعتبر أول عمل سعودي طويل يتصور بالكامل داخل بوليفارد وورلد ومتوقع نشوفه بالسينما خلال 2027 والرهان اليوم على صناعة أفلام سعودية تنافس عالميًّا 

SHARABLES

…أشياء ممكن تهمك

حجاج إندونيسيا يملون المطار روحانية

أمه جات من آخر القاعة تحتفل فيه

تنازل عن جزء من أرضه عشان يختصر على جيرانه

جولة تفقدية لمشروع استاد الملك فهد

NEWS

حسم الجدل.. وش لغة التدريس في جامعة الرياض للفنون؟ 

السوشل ميديا دايمًا منصة سريعة للنقاشات، والأيام اللي راحت شهدت جدل واسع حول لغة التدريس في جامعة الرياض للفنون، بس الجامعة ما خلت الموضوع يطول وتدخلت بسرعة عشان توضح الصورة وتنهي النقاش بشكل رسمي وحاسم

وش السالفة؟ 

القصة كلها بدأت بعد ما انتشر مقطع للأستاذة نهى (وكيلة وزارة الثقافة للشراكات) في برنامج بودكاست، وذكرت فيه إن لغة التدريس في كلية الفنون بجامعة الرياض بتكون باللغة الإنجليزية هالتصريح انتشر بسرعة وفتح باب نقاش كبير بين الناس حول أهمية اللغة العربية وارتباطها بالفنون والثقافة

التوضيح الرسمي الحاسم 

تفاعلاً مع هالنقاشات، طلع المتحدث الرسمي المكلّف للجامعة "عبدالمجيد العساف" ببيان يوضح الصورة كاملة، وأكد فيه على نقاط جوهرية

اعتماد اللغتين: العربية والإنجليزية مكملين لبعض في المسيرة التعليمية

حسب التخصص: لغة التدريس تتحدد بناءً على طبيعة كل تخصص ومتطلباته الأكاديمية

الهوية أولاً: المناهج مستحيل تكون بمعزل عن الهوية الوطنية والثقافة السعودية الأصيلة

الخلاصة 🌟

من الآخر.. قصة وضحى الشمري ملهمة وتؤكد إن شبابنا وبناتنا قادرين يثبتون وجودهم ويتركون بصمة في أكبر المحافل التعليمية الدولية 

NEWS

فنان سعودي يفاجئ بنت من ذوي الهمم بلوحة جمعتها بأبوها المتوفي ❤️🎨

تدرون وش يعني الفن الحقيقي؟ يعني لما يلمس الروح ويصنع فرحة تعيش بالذاكرة وما تتنسى أبدًا وهذا بالضبط اللي سواه فنان سعودي مبدع لما قرر يترجم مشاعر غالية بريشته وألوانه

وش السالفة؟ 

الفنان السعودي المبدع أحمد البيدي حب يسوي شي يبقى بالذاكرة فقرر يمسك ريشته ويرسم لوحة خاصة ومميزة لبنت غالية علينا من ذوي الهمم والفكرة ما كانت مجرد رسمة عادية بل إن اللوحة جمعت البنت مع أبوها الله يرحمه ويغفر له في مشهد يجمعهم سوا واللحظة اللي وراها فيها اللوحة كانت مليانة مشاعر وقال لها من قلب صادق أنتِ أحلى من اللوحة بمليون مرة

💡 الخلاصة

ردة فعل البنت وفرحتها ولمعة عيونها اختصرت كل الحكي ومست قلب كل من شافها وهاللقطة تثبت إن الفن الحقيقي هو اللي يطلع من المشاعر الإنسانية ويسعد الغير

تابع أفضل المقابلات والقصص المؤثرة على لوڤن شو🎥