متحمسين كالعادة نشارككم آخر الأخبار اللي تهمكم: من كلاسيكو المراكز الإعلامية اللي ولع بعد المباراة لرحلة الرياض والكويت اللي صارت بساعة ونص، ومن مغامرة محمد الملا السينمائية بالبوليفارد، لكبسولات مطار الدمام الجديدة، وصولًا لفزعة السعوديين مع الطفلة اشتياق

NEWS

كلاسيكو ما بعد المباراة.. من أرض الملعب للمراكز الإعلامية ⚽🔥

المنافسة بين الأندية الكبيرة ما توقف مع صافرة الحكم بل تنتقل لساحات السوشل ميديا والمراكز الإعلامية اللي تولع الأجواء وتزيد الحماس بين الجماهير

وش السالفة؟ 

القصة بدأت بصورة نزلها حساب النصر بعد نهاية المباراة مباشرًا وكان فيها عبارات طقطقة واضحة وموجهة للنادي الأهلي والمركز الإعلامي للأهلي ما سكت ورد بصورة للبطولتين الآسيوية اللي حققوها مؤخرًا كرد مباشر على النصر اللي ما قدر يحقق هاللقب القاري

استفزاز ديميرال 🏅

 المدافع التركي ميريح ديميرال قرر يحتفل بطريقته الخاصة والمستفزة جدًّا وجاب معه ميدالية أبطال آسيا لملعب النصر وبعد نهاية المباراة جلس يستعرض فيها ويستفز جماهير ولاعبين النصر وبعدها نزل تغريدة زادت من تفاعل الجماهير والمناوشات

💡 الخلاصة

الإثارة في كرتنا السعودية تتجاوز الـ 90 دقيقة والمناوشات الإعلامية جزء من حلاوة الكورة اللي تخلينا نعيش أجواء التنافس لأيام بعد المباراة 

NEWS

الرياض والكويت.. ساعة ونص وتوصل 

دايم نشيل هم المسافة بين الرياض والكويت، لكن قريباً هالمسافة بتصير ذكرى! السر يكمن في مشروع "قطار الشدادية" اللي راح يربط العاصمتين بمسار مباشر ومنفصل، والهدف؟ تجربة سفر عصرية تخليك تكنسل فكرة المطار نهائياً

وش السالفة؟ 

المشروع مو مجرد سكة حديد، هو نقلة نوعية بتربط الرياض بمحطة الشدادية جنوب الكويت بمسافة تمتد بين 500 إلى 650 كم والميزة هنا إن المسار منفصل تماماً عن مشروع الربط الخليجي الساحلي، يعني طريق "سيدين" وسريع ومخصص لراحة المسافرين وتعزيز التجارة

سرعة طيارة.. وسعر باص ✈️🚌

عشان تكون التجربة استثنائية، القطار مصمم عشان ينافس الطيران في الراحة والسهولة

رفاهية عالمية: قطارات مجهزة بأعلى المواصفات الإقليمية لضمان راحة الركاب

سعة عالية: البداية بتكون بنقل 3,300 راكب يومياً عبر 6 رحلات ذهاب وإياب مستمرة

أسعار تنافسية: التذاكر ستكون "في متناول الجميع"، يعني توفير في الجيب وراحة في البال

متى بنركب القطار؟ 📅

الخطة واضحة والجدول الزمني مرسوم بدقة

2026: البداية الفعلية لأعمال التنفيذ بعد انتهاء مرحلة التصاميم يعني 4 سنوات هي مدة العمل المتوقعة على كامل المشروع تحديدا ديسمبر 2030 بيكون الموعد المرتقب للافتتاح الرسمي والتشغيل الكامل

💡 الخلاصة

منظومة النقل بين المملكة والكويت داخلة مرحلة "السرعة القصوى"؛ لأن الربط بين الرياض والشدادية مو بس بيقرب المسافات، بل بيعزز التبادل التجاري والسياحي ويفتح آفاق جديدة لرفاهية المسافر الخليجي

NEWS

محمد الملا يقود مغامرة سينمائية مالها حدود في البوليفارد 🎬🍿

السينما السعودية جالسة تعيش عصرها الذهبي واليوم إحنا قدام خطوة جديدة تعكس تطور هالمجال وروح الجيل الجديد من صناع الأفلام بعمل يقلب موازين الترفيه بلمسة سعودية فخمة

وش السالفة؟ 

المخرج المبدع محمد الملا يبدأ تصوير أول تجاربه السينمائية الطويلة برعاية من هيئة الترفيه وموسم الرياض والقصة تبدأ ببوابة زمنية غامضة تنفتح فجأة فوق بوليفارد وورلد وتطلع منها عوالم وحضارات مجهولة وهنا يلقى حارس أمن بسيط وعائلة سعودية نفسهم في مواجهة خطر يهدد استقرار المدينة بمغامرة مجنونة تمزج بين الكوميديا والأكشن

نجومنا وموقع التصوير 🌟

 الفيلم يضم بطولة جماعية بمشاركة نجوم مثل أبو سلو ولمى الكناني وأسيل عمران وخالد عبدالعزيز ولأول مرة بنشوف فيلم روائي طويل يتصور بالكامل داخل جنبات ومناطق بوليفارد وورلد العالمية وكل زاوية هناك جالسة تتحول لموقع تصوير حي يعيشنا جو الكواليس

💡 الخلاصة

لما تضيق الأمور، مطاراتنا هي المكان الآمن.. ومطار الدمام اليوم أثبت إنه مو بس بوابة للمنطقة الشرقية، بل هو الركيزة اللي تعتمد عليها سماء الخليج وقت الأزمات  

SHARABLES

…أشياء ممكن تهمك

الشريان ينفي خبر نقله 

سعودية الكل يتكلم عن زواجها

ظاهرة غريبة في نفودنا 

تركي آل الشيخ بستايل بيكي بلايندرز

NEWS

انسوا كراسي الانتظار.. مطار الدمام جاب لكم الحل 😴✈️

دايم همّنا في السفر هو "الانتظار"، خاصة لو الرحلة تأخرت أو عندك "ترانزيت" طويل لكن مطار الملك فهد الدولي بالدمام قرر يغير المعادلة، وبدال ما تدور زاوية هادية وتتعب ظهرك على كراسي الانتظار، جاب لك الحل اللي يخليك تنام وأنت مرتاح

وش السالفة؟

المطار أطلق رسمياً خدمة كبسولات النوم وهي عبارة عن غرف فندقية مصغرة وذكية، مصممة خصيصاً للمسافرين اللي يحتاجون غفوة رايقة بعيداً عن إزعاج الصالات وزحمة الناس الخدمة توفر لك الخصوصية اللي تحتاجها عشان تشحن طاقتك قبل رحلتك الجاية

مو بس سرير.. كبسولة متكاملة 📱💡

الكبسولة هذي مو مجرد مكان للنوم، هي جناحك الخاص اللي فيه كل سبل الراحة

خصوصية تامة: افصل عن العالم الخارجي بضغطة زر

تحكم ذكي: نظام تكييف خاص فيك، وإضاءة تقدر تتحكم في حدتها على جوّك

شحن وترفيه: شاحن لأجهزتك وشاشة ترفيه عشان تستمتع بوقتك وأنت تنتظر

💡 الخلاصة

مطاراتنا اليوم ما صارت مجرد محطات عبور، بل صارت أماكن تقدم حلول مبتكرة لراحة المسافر خدمة "كبسولات النوم" في مطار الدمام هي خطوة جديدة تعكس تطور الخدمات اللوجستية في المملكة، وتثبت أن "راحة المسافر" هي الأولوية دائمًا 

NEWS

كيف ساعدوا السعوديين الطفلة اشتياق في أصعب لحظاتها؟

في لحظة ما كانت على البال تحولت حياة الطفلة "اشتياق الشراري" لقصة توجع قلب كل من يسمعها ،اشتياق تعرضت لهجوم مفاجئ من "جمل" تسبب لها بإصابات قوية دخلتها المستشفى بحالة حرجة، وهنا بدأت رحلة من الصبر والانتظار خاضها أبوها وهو ماله غير الله ثم مناشدة ولاة الأمر وأهل الخير عشان ينقذون بنته

وش السالفة؟ 

السالفة بدأت في الشمال، الأب كان يبي بنته تنتقل للرياض لأن حالتها صعبة وماطولوا اهل الخير عندنا وطلعوا هاشتاق #اشتياق_الشراري وصار ترند بكل مكان والناس صارت تدعي وتطالب، وما مر وقت طويل إلا وجاء التوجيه الكريم بنقلها فوراً للرياض، وهنا بدأت أول خطوة في طريق الأمل

الجو عاندنا.. بس وقفة الناس كانت أقوى 🌩️🎁

يوم جت طيارة الإخلاء تنقلها، الجو قلب فجأة وعاند الرحلة وتأخرت، لكن سبحان الله هالتأخير كشف لنا معدن الناس،غرفتها في المستشفى امتلت هدايا وألعاب من ناس ما يعرفونها، الكل كان يبي يجبر خاطرها ويوصلون لها رسالة  "حنا أهلك"، وصارت الغرفة كأنها محل ألعاب من كثر الحب اللي جاها من كل مكان

أبشركم.. اشتياق سوت العملية

الخبر اللي يسعد القلب وصل، اشتياق وصلت الرياض وسوت عمليتها أمس والحمد لله نجحت الحين هي في غرفة الإفاقة والأمور طيبة ومستقرة، وبإذن الله ترجع لبيتها وأهلها وهي بأتم صحة وعافية وتنسى كل هالأيام الصعبة

الخلاصة 🌟

قصة اشتياق أثبتت لنا إننا في وطن الجسد الواحد، فزعة بدأت بتغريدة وانتهت بإخلاء طبي ورعاية كاملة.. هذي هي فزعة السعوديين، ما يخلون أحد ولا يرضون لبنتهم بغير الشفاء

تابع أفضل المقابلات والقصص المؤثرة على لوڤن شو🎥