- Lovin Saudi | لوڤن السعودية
- Posts
- ذهبيتين الجوجيتسو، ووداعاً لزحمة الصبح، ولوحات تسافر بك عبر الزمن
ذهبيتين الجوجيتسو، ووداعاً لزحمة الصبح، ولوحات تسافر بك عبر الزمن
Augustus Media FZ LLC
June 04, 2026
🙏🏻💚 أهلاً بك في نشرتنا الأسبوعية من لوڤن السعودية
أخبار رهيبة تنتظرك … جاهز؟🇸🇦
متحمسين نشارككم أخبارنا الرهيبة: من ساعات العمل المرنة اللي تفك زحمة الرياض، للوحات صالح القرني التاريخية، ومن ذهبيتين عمر ندا بالجوجيتسو، لرضا غشام اليامي وسط النفود، وصولًا لتصريحات بيتروس
NEWS
اربع ساعات عمل مرنة
زحمة الدوامات الصباح في الرياض دايمًا كانت التحدي الأكبر والمشوار اللي يستنزف طاقة كل موظف بس اليوم الوضع بيتغير للأفضل بالتعاون مع وزارة الموارد البشرية بدأ تطبيق مبادرة لساعات العمل المرنة على أكثر من 50 جهة عمل في العاصمة
وش السالفة؟
لمبادرة تعطي نافذة حضور مرنة مدتها 4 ساعات عشان توزع الكثافة المرورية وتخفف الزحمة كليًّا وجدولها مقسم بذكاء للجهات التابعة للخدمة المدنية يبدأ حضورهم من 5:30 حتى 9:30 صباحًا والجهات التابعة لنظام العمل يبدأ حضورهم من 7:00 حتى 11:00 صباحًا والمبادرة تستهدف أهم 6 مناطق حيوية وهي: (كافد، المدينة الرقمية، حي السفارات، ليسن فالي، غرناطة بزنس، وواجهة روشن)
لغة الأرقام وأهداف المبادرة 📊
هالمبادرة ضرورية لأن الدراسات تكشف إن 87 بالمية من الموظفين يشعرون بتوتر شديد وقت الذروة و79 بالمية يأكدون إن الزحام يأثر سلبًا على صحتهم النفسية والمبادرة تهدف لتحقيق انسيابية مرورية عالية ورفع كفاءة التنقل وتخفيف الضغط على الموظفين مع استثناء القطاعات اللي تتطلب استمرارية التشغيل مثل القطاع الطبي والتعليم العام
💡 الخلاصة
هالمبادرة مو مجرد قرار إداري لتخفيف زحمة السيارات بل هي قرار يحمي صحة الموظفين ونفسياتهم ويصنع بيئة عمل صحية ومريحة تخلي مشوار الدوام أروق وأسهل بكثير
NEWS
ريشة سعودية توثق تاريخنا
الفن مو بس ألوان تنحط على قماش الفن الحقيقي هو اللي ينقلك بالزمن ويعيشك اللحظة والفنان السعودي المبدع صالح القرني أثبت هالشي وقدم لنا لوحات تاريخية كأنها آلة زمن تاخذك في رحلة بصرية لأهم وأعظم المحطات في تاريخنا
وش السالفة؟
لوحة التضحية الأعظم 🕌💔
من أكثر اللوحات تأثيرًا هي اللي تجسد اللحظة المأساوية لاغتيال الإمام عبدالعزيز بن محمد بن سعود وهو يصلي بالمسجد عام 1803 والمشاعر وتوزيع الإضاءة وتفاصيل الغدر في هاللوحة تخليك واقف بمكانك مبهور وتعيش هيبة ورهبة الموقف بكل تفاصيله
لوحة قط الرس البطل 🐈🛡️
من أرهب القصص اللي خلدها القرني هي لوحة قط الرس اللي تحكي قصة القط الشهير اللي استخدموه أبطال المقاومة بالرس بذكاء عشان يخربون خطة إبراهيم باشا والقط فجر لغم العدو قبل ما يهدم سور المدينة وطلع مو بس قط عادي بل بطل حقيقي له بصمة وموقف شجاع محفوظ بذاكرة التاريخ
الموهبة الحقيقية دايمًا تفرض وتثبت نفسها وهالإبداع لفت الأنظار وتوج بلقاء الفنان بصاحبة السمو الملكي الأميرة ريما بنت بندر سفيرة خادم الحرمين بأمريكا والقرني أهداها لوحة بورتريه فخمة رسمها لها مخصوص في لقطة نجاح وإنجاز كبير يستاهله هالفنان المبدع
💡 الخلاصة
الفنان صالح القرني جالس يؤرشف تاريخنا المجيد وبطولات وشجاعة أجدادنا وإرثنا العظيم بأسلوب فني ساحر يحفظه للأجيال الجاية ويبقى محفور في الذاكرة
NEWS
انتبه تحارش عيالنا
المنتخب السعودي حصد 5 ميداليات تنوعت بين ذهبيتين و3 برونزيات في بطولة نظمها الاتحاد الدولي للجوجيتسو في كاليفورنيا بمشاركة عالمية وهالإنجاز يثبت تطور اللعبة وقوة أبطالنا في المنافسات الدولية
وش السالفة؟
البطل عمر ندا توج بالذهبيتين بأداء استثنائي أثبت فيه إنه رقم صعب في عالم الجوجيتسو، والميداليات البرونزية جاءت بفضل أداء قتالي شرس من أبطالنا محمد بن حريمل وإلياس بنجر وخالد حباب اللي توجوا بالبرونز
الخلاصة 🌟
نجوم واعدة تبشر بمستقبل مشرق لرياضة الجوجيتسو السعودية وترفع الراس في كل المحافل الدولية
SHARABLES
…أشياء ممكن تهمك
NEWS
الحديد يجي ويروح.. والمهم سلامة الروح
دايمًا إذا جينا نطري رحلات البر يجي بالبال الجيوب والشاصات عشان تقاوم النفود لكن المستكشف غشام اليامي كسر هالقاعدة تمامًا وأثبت إن الخبرة بالديرة هي الأساس يوم قدر يقطع النفدان بسيارة اقتصادية صغيرة
وش السالفة؟
الموضوع اللي خلى اسم غشام يتصدر الترند هو مقطع فيديو انتشر له وهو في أعماق النفود والسيارة شبت نار فجأة والتهمتها كاملة وسط الرمال والصدمة كانت في ردة فعل غشام الأسطورية يوم طلع بالفيديو يصور والنار شابة وراه وهو يتكلم بابتسامة وهدوء غريب ونبرة كلها رضا بقضاء الله وقدره
وقفة ربعه المقانيص 🤝
الناس تفاعلت مع المقطع وامتدادًا لعاداتنا وقيم الفزعة بادروا عدد من ربعه المقانيص وأهل الخير بوقفة مع غشام وقدموا له مساعدات مالية تعينه وتخفف عنه وهالشي يبيض الوجه ويثبت إن الدنيا لسه بخير
💡 الخلاصة
سالفة غشام تعلمنا إن الشغف يعتمد على همة الشخص وموقفه علمنا إن اللي يستقبل الصدمة بالرضا ربي يربحه محبة الناس واحترامهم والحمد لله على سلامته
NEWS
وفاء بيتروس للسعودية ما يتغير
إذا فيه لاعب أجنبي ترك بصمة عند جمهور النصر فبيتروس أكيد واحد من أكثر الأسماء اللي للحين الناس تتذكرها سواء بسبب شخصيته داخل الملعب أو علاقته القوية مع الجماهير
وش السالفة؟
لاعب النصر السابق رجع يتصدر الترند بعد ظهوره في مقابلة تكلم فيها عن السعودية وعلاقته بالمملكة وخلال المقابلة أظهر بيتروس صورة سمو ولي العهد الموجودة على جواله ووصفه بقائدنا وقال إنه طلب جوال جديد وبيحط عليه نفس الصورة وهالتصريحات رجعت فتحت النقاش عن علاقة اللاعب البرازيلي بالسعودية خصوصًا إنه غادر النصر من سنوات
💡 الخلاصة
بيتروس لعب بقميص النصر بين 2018 و2021 وحقق بطولات وترك بصمة كبيرة ومع كل ظهور جديد له واضح إن اسمه يقدر يرجع للنقاش بسرعة خصوصًا لما تكون التصريحات مرتبطة بالسعودية وجماهير النصر
