- Lovin Saudi | لوڤن السعودية
- Posts
- من إيقاف وليد العنزي لستريك السناب ومجتمعات الرياض
من إيقاف وليد العنزي لستريك السناب ومجتمعات الرياض
Augustus Media FZ LLC
June 23, 2026
🙏🏻💚 يا هلا بك في نشرتنا الأسبوعية
أخبار رهيبة تنتظرك … جاهز؟🇸🇦
متحمسين نشارككم أخبارنا الرهيبة: من قرار منع وليد العنزي من الظهور، لقصة بن هاربورغ، ومن أغرب ملاعب العالم اللي جالس يتحول لواقع، ومن ستريك السناب اللي صار مقياس الصداقة، وصولًا لأفضل طريقة تتعرف على ناس تشبهك وتشاركك نفس الشغف
NEWS
وش السبب الحقيقي ورا المنع؟
الكل تفاجأ بالفترة الأخيرة بمقطع الوداع المؤثر للراوي "وليد العنزي" وهو يعلن صدور قرار نهائي بحقه من الهيئة العامة لتنظيم الإعلام العقوبة كانت غرامة 20 ألف ريال، حذف قناة اليوتيوب نهائياً، ومنعه من النشر أو الظهور الإعلامي في كل المنصات مدى الحياة وحتى كتابة الكتب!
وش السالفة؟
العاطفة دايم تخلينا نشوف نهاية القصة وننسى بدايتها؛ وليد نفسه ذكر في مقاطع سابقة إن الهيئة حذرته أكثر من مرة، والقرار ما جاء فجأة، بل سبقه تنبيهات وخطوط حمراء واضحة، لكن الاستمرار على نفس النهج في الطرح هو اللي وصّل الأمور لهالمنحنى الصعب والنهاية الحزينة لقناته
السبب الحقيقي.. النبش في قصص النزاعات والقبائل 📖❌
المشكلة الأساسية كانت في ذكر أسماء القبائل في قصص تاريخية قديمة تعتمد على الثأر، والنزاعات، والغزوات اللي أغلبها ماله إثبات تاريخي رسمي أو موثق ونبش هالأمور وطرحها للملايين في السوشيال ميديا يفتح باب "النعرات القبلية" اللي مجتمعنا وتلاحمنا الوطني بغنى تام عنها
الخلاصة 🌟
من الآخر.. القرار رغم قسوته وصدمته للمتابعين اللي يحبون قصصه، إلا إنه قرار تنظيميري وجاء لحماية وعي المجتمع، وأمنه اللفظي، والحفاظ على اللحمة الوطنية بعيداً عن إثارة الحساسيات القديمة بين الناس
NEWS
بن هاربورغ.. عقل استثماري وشغف سعودي
استقبلتوني بكل مكان بالسعودية، والحين جا دوري.. بهالكلمات بدأ المستثمر الأمريكي "بن هاربورغ" يكتب قصة مختلفة تماماً عن أي مستثمر أجنبي ثاني لأنها قصة مليانة تقدير، محبة، ورد جميل ويثبت إن السالفة عنده مو مجرد بزنس بل ارتباط حقيقي بالمجتمع
وش السالفة؟
عن طريق "مجموعة هاربورغ"، استحوذ "بن" على 100% من نادي "الخلود" بالرس، كخطوة تاريخية ضمن مشروع الخصخصة الرياضية لرؤية 2030 والرجال ما اكتفى بالاستثمار بس، بل صار يتفاعل مع كل شيء يخصنا وكأنه ولد البلد
فزعة فيزا المونديال..✈️🎟️
لما واجهوا المشجعين السعوديين صعوبة في مواعيد السفارة الأمريكية عشان يلحقون يشجعون المنتخب بكأس العالم، بن ما وقف يتفرج؛ تواصل مع جهات بالسفارة، ورتب طريقة سريعة ورسمية لتسهيل الإجراءات، ونزل الخطوات بالتفصيل على حسابه عشان يخدم كل مشجع سعودي
تغريدات بروح نجدية وباب مفتوح للكل 📱🏠
الموضوع مع بن مو شغل وكالة علاقات عامة تكتب له كلام مصطنع؛ الرجال يغرد بأسلوبنا وعزم الناس بعبارة نجدية أصيلة: "القريب يقرّب والبعيد يبشّر بالعوض"! مو بس كذا، فتح بيته واستضاف المشجعين وصناع المحتوى مثل عبدالعزيز الدهمشي وثنيان الجعفري لدعم المنتخب
💡 الخلاصة
من الآخر.. بن هاربورغ جالس يغير مفهوم ملكية الأندية عندنا ويكتب قواعد جديدة مستثمر جا يشاركنا الشغف بعيد عن الرسميات والتصنع، وبأفعاله وفزعته كسب محبة الشارع الرياضي والسعوديين كلهم
NEWS
السعودية قاعدة تبني أيقونة فوق جبل
من يوم أعلنوا عنه والناس تقول: "هل فعلاً بيصير؟" واليوم الجواب صار واضح بالملعب.. أولى الأساسات في استاد الأمير محمد بن سلمان بمدينة القدية اكتملت رسمياً، والمشروع دخل مرحلة التنفيذ الفعلية بعد ما كان مجرد تصاميم تبهر العين
وش السالفة؟
اللي يخلي هذا الملعب مختلف عن أي مكان بالعالم، إنه مبني على ارتفاع 200 متر فوق جبال طويق، ويطل مباشرة على القدية، ويتسع لـ 46 ألف متفرج
والأهم؟ بيكون واحد من الملاعب الرئيسية اللي بنستضيف فيها كأس العالم 2034 بإذن الله
تكنولوجيا سابقة عصرها.. والافتتاح قريب ⏱️🤖
القصة ما توقف عند الموقع وبس الملعب مصمم بتقنيات تعتبر الأكثر تطوراً عالمياً: سقف وأرضية وجدار متحركة، وأكثر من 1.5 كم من شاشات العرض، ونظام تبريد مستدام يخليه شغال فعاليات طوال السنة وإذا مشت الأعمال حسب الخطة، الافتتاح بـ 2029 يعني بعد سنتين ونص تقريباً
💡 الخلاصة
من الآخر.. حنا ما نبني ملاعب عادية، حنا قاعدين نشكّل تاريخ جديد للرياضة والمعمار فوق قمم الجبال، والأيام الجاية بتثبت للعالم وش يعني طموح وهندسة سعودية
…أشياء ممكن تهمك
NEWS
هوس الستريك تواصل ولا التزام؟
اللي بدأ كمجرد ميزة بسيطة في سناب شات، تحول فجأة لروتين يومي يسيطر على الملايين، لدرجة إن البعض صار يعتبره "مقياس الأخوة" ومدى قرب الشخص منك في حياتك الواقعية
وش السالفة؟
السالفة تحولت لتحدي ما يوقف؛ الأخويا، عيال العم، وحتى الناس اللي ما كلمتهم من سنين، يرسلون سنابات يومية بس عشان يحافظون على الرقم اللي جنب الاسم وعشان تفهم عمق السالفة، الكل يتذكر المقطع الشهير لـ الشاب اللي قلب الدنيا وعصب بشكل مو طبيعي بس لأن الستريك حقه طار
من وناسة وتسلية.. إلى ضغط نفسي وهم 🤯📉
ومع الوقت، السالفة قلبت عند البعض من تسلية إلى هم وقلق؛ شباب كثير وثقوا تجربتهم وكيف إن المحافظة على مئات الستريكات حسستهم بضغط وإرهاق عاطفي، وتورطوا بميزة تحولت من تواصل بسيط إلى واجب ثقيل مو قادرين يهربون منه
هل الستريك يحدد قيمتك؟ المواقف هي المقياس 💯🤝
مؤخراً، صار فيه وعي وتساؤلات عقلانية بالمنصات: وش القيمة الحقيقية للستريك؟ وفعلياً هو مو مقياس للصداقة ولا يعكس أبدًا معزتك؛ لأن العلاقات الحقيقية تبان وقت الحاجة وفي المواقف الصعبة، مو في كورة نار تروح وتجي
💡 الخلاصة
من الآخر.. الستريك ميزة ذكية خلتنا ندمج حياتنا بالتطبيق، حلوة للتسلية لكن لا تخليها تقيم أصحابك الصاحب السنع تلقاه بظهرك وقت الضيق، طار الستريك ولا قعد!
جهزنا لك ٣ خيارات
طفشت من روتين النادي والتمارين المعتاده؟ إذا ودك تتحرك، وتغير جو، وتتعرف على ناس رهيبة بنفس الوقت.. الرياض مليانة مجتمعات رياضية
يعني منها ترفع لياقتك ومنها تختلط بناس جديدة تعطيك طاقة وحماس يخليك تستمر بدون ملل
يلا بايك (Yalla Bike)
جوّك سياكل؟ هذا القروب لك
الفريق يسوي جولات بأماكن مختلفه زي وادي حنيفة ومحمية الملك خالد والرهيب إنهم مخصصين أيام للبنات بس! يعني تقدرين تاخذين راحتك وتستمتعين بالجولة مع صحباتك بأجواء حلوة وهادية
تنس لاب (Tennis Lab)
في خاطرك تجرب التنس ومو عارف من وين تبدأ؟ هالمجتمع بيختصر عليك الطريق مسوين كلاسات جماعية للمبتدئين، يعني لا تشيل هم أبد إذا هذي أول مرة لك، الكل جاي يتعلم والجو هناك مرة ودي واجتماعي، يعني بتلعب وتتعلم وتتعرف على ناس تشاركك نفس الجو والشغف
وي رن (We Run)
إذا تحب الركض بس تحتاج ناس تحمسك وتلتزم معها عندك "وي رن" نظامهم يركضون كل ٣ أيام وأحلى شي عندهم "المرونة" لانهم يسوون ركضات صباحية ومسائية عشان تناسب جدولك مهما كان زحمة فا زبدة الكلام: اربط جزمتك واطلع معهم بأول مشوار
الرياضة تصير أمتع واحلى بكثير إذا كانت مع قروب يشجعك ويزيد يومك حماس اختار الجو اللي يناسبك، وتوكل على الله.. وابدأ كسر الروتين من اليوم
