من النقاش الواسع عن راتب الزوجة ومشاركتها، لاقتراب ملعب أرامكو من شكله النهائي، ومن إعلان الوسيط الغريب اللي أثار الجدل، للدخول بفترة جمرة القيظ، وصولًا لألذ سموذي وتبرد على قلبك بحر الرياض

NEWS

نقاش واسع عن راتب الزوجة بين مشاركتها مع الزوج أو الاستقلالية 💸🤔

موضوع راتب الزوجة يعتبر من أكثر المواضيع اللي تفتح باب النقاش بكل مجلس ومنصة والجدل دايمًا يدور حول نقطتين أساسيتين هل الراتب جزء من شراكة الحياة الزوجية والمصاريف المشتركة؟ ولا هو حق خاص ومستقل للزوجة ما يتدخل فيه الزوج؟

وش السالفة؟

فهد سال.. الزواج شراكة وفريق واحد 🤝 

صانع المحتوى فهد سال طرح وجهة نظره بوضوح وقال إن الزوجين لازم يكونون فريق واحد وانتقد فكرة إن الزوجة تخلي راتبها لوناستها الشخصية وتترك الزوج يشيل حمل مصاريف البيت لحاله وأكد إن دمج الراتبين يرفع مستوى المعيشة ومصلحة العائلة

منى أبو سليمان.. التعاون مطلوب وحفظ الحقوق أهم ✍️ 

ردت سيدة الأعمال منى أبو سليمان بواقعية وقالت إن المعيشة تتطلب دخلين بالبيت بس وضحت إن فيه نساء يساهمون ماليًّا بس ما يلقون تقدير كافي واقترحت توثيق مساهمة الزوجة كقرض مالي وضرورة إنها تكون شريكة قانونية باستثمارات الزوج

💡 الخلاصة 

الآراء انقسمت لاتجاهين واضحين الأول يشوف الحياة الزوجية قايمة على التعاون لمصلحة العائلة والثاني يأكد إن راتب الزوجة حق شرعي واستقلالها ضمان لمستقبلها وبالنهاية تظل هالقضية مرتبطة بظروف كل عائلة وتفاهمهم الخاص

NEWS

كل أسبوع ملعب أرامكو يقترب أكثر من شكله النهائي 🏟️🏗️

قبل أشهر كان ملعب أرامكو عبارة عن هيكل إنشائي ضخم أما اليوم فهو يقترب أكثر من شكله النهائي مع دخول واحدة من أهم مراحل التنفيذ وهي تجهيز أرضية الملعب وتركيب نظام العشب بخطوة تعكس وصول المشروع لمراحله الأخيرة

وش السالفة؟

اكتمال المقاعد والواجهة الخارجية 💺 

المشاهد المتداولة من الموقع تشير إلى إن أعمال المقاعد اكتملت بشكل كبير وتم تركيب الشاشة العملاقة وأصبحت الواجهة الخارجية شبه مكتملة ليبدأ التركيز الآن على تجهيز أرضية الملعب وفق أعلى المعايير العالمية

دقة متناهية ونظام عشب احترافي 🌱 

مرحلة أرضية الملعب دقيقة وتشمل زراعة العشب وتنفيذ طبقات متخصصة من أنظمة التصريف والري والتهوية وتجهيز القاعدة لضمان الجودة طوال العام وصمم نظام العشب ليواكب المواصفات الاحترافية ويضمن استدامة الأداء

💡 الخلاصة 

الملعب يدخل مرحلة التشطيبات النهائية والاختبارات التشغيلية ليقترب من افتتاحه الرسمي وينتظر يكون أحد أبرز المنشآت الرياضية ومن الملاعب المستضيفة لبطولة كأس العالم 2034 ليعكس حجم التطور الرياضي بالمملكة

…أشياء ممكن تهمك

صانع المحتوى "برقت" يستلم رابطة الأرجنتين في أمريكا

من طيارات يقصقصها بغرفته.. لين طيّرها صدق مع المهندسين

استنقصوا من شغله والمجتمع وقف معه

الرياض راح تكون غير قريب

NEWS

نادي سعودي يثير الجدل بعد إعلان وظيفي من قبل وسيط 📸🤨

الكفاءات الوطنية بمجال التصوير والإعلام الرياضي أثبتت نفسها وبقوة بالسنوات الأخيرة لكن إعلان وظيفي غريب وفتح باب النقاش حول تمكين أبناء الوطن

وش السالفة؟

نادي يبحث عن مصورين أجانب 👀 

القصة بدأت يوم نزل موظف بأحد أندية دوري يلو إعلان يبحث فيه عن مصور وصحفي للعمل بالنادي والغريب إن الإعلان موجه لاستقطاب أجانب عن طريق وسيط وتضمن عروض مغرية منها السكن وتكفل التأشيرة وراتب مجزي

الخلود والأنوار.. فخر بالكفاءات الوطنية 🦅💚

المصورين السعوديين تفاعلوا بعتب واستغربوا ليش الإعلان ما نزل بحساب النادي الرسمي وبوسط هالجدل برزت أندية بمواقف ترفع الراس زي نادي الخلود اللي رد بتغريدة يفتخر فيها بكوادره السعودية بالكامل ونادي الأنوار اللي شدد إن أبناء الوطن هم ركيزة النجاح

💡 الخلاصة 

إن شبابنا أثبتوا كفاءتهم بتغطية أكبر الفعاليات والأولوية دايمًا لازم تكون لعيالنا لأن تمكين أبناء الوطن مو مجرد شعار بل استثمار حقيقي بطاقات مبدعة ولهم الحق بأخذ هالفرص اللي هم أولى فيها

NEWS

السعودية دخلت رسميًّا فترة جمرة القيظ 🔥🌡️

إذا حسيت إن الحر هالأيام مختلف فإحساسك بمحله لأن السعودية دخلت رسميًّا فترة جمرة القيظ وهي الفترة اللي تعرف بأنها الأشد حرارة خلال السنة وتمتد من 16 يوليو إلى 10 أغسطس

وش السالفة؟

الأحساء تسجل 50 درجة ☀️ 

بداية الفترة كانت قوية بحيث سجلت الأحساء 50 درجة مئوية كأعلى درجة حرارة ترصد بالمملكة حتى الآن خلال هذا العام بمؤشر إن الأسابيع الجاية بتكون حارة جدًّا بعدد من المناطق

ما بعد طباخ التمر إلا سهيل 🌴 

مع نهاية الجمرة تبدأ الأجواء تتغير ومن 11 إلى 23 أغسطس يدخل موسم طباخ التمر وبعدها يطلع نجم سهيل واللي يعتبر بداية الانفراج التدريجي وانخفاض الحرارة قبل ما يبدأ الخريف فلكيًّا بسبتمبر

💡 الخلاصة 

مع وصول الحرارة لمستويات مرتفعة الناس صاروا يغيرون روتينهم اليومي لطلعات بعد المغرب وإذا عندك مشاوير خل دايمًا معك موية وتجنب الشمس وقت الظهيرة لأن الصيف للحين ما خلص مفاجآته

NEWS

وين تلقى أفضل سموذي بالرياض؟ 🥤🧊

السموذي يعتبر من أفضل المشروبات ومو بس يبرد عليك حتى إنه يعتبر وجبة متكاملة وتقدر تاخذ منه فوايد كثيرة وتحسه خفيف وصحي وعشان كذا جمعنا لكم لستة بأكثر الأماكن بالرياض اللي تناسبكم

آرتشي 🥜 

محل آرتشي عندهم تشكيلة تفوز والسموذي حقهم يجي فيه 30 غرام بروتين تقفل احتياجك اليومي وللي يحبون زبدة الفول السوداني عندهم مشروب خاص فيه بيعجبكم وبرضو مشروب مختلف بالتوت يروق

جو أند ذا جوس 🍏 

خياراتهم كثيرة وتحتار وش تطلب وعلى إنه خفيف إلا إنه مريح للجهاز الهضمي وننصحكم بـ مشروب ترست يور قيت الخيالي والمليان تمر وبروتينات اللي طعمه يروق ويفيد بنفس الوقت

كرنل 🍉 

تشكيلتهم ما تمزح وعندهم نكهات فرش زي الباشن فروت والمانقا وحتى الجح وأحلى حركة عندهم إنك تقدر تسوي مكس وتطلب طبقات من النكهات اللي تعجبك على كيفك وتبرد عليك

بيك 🍓 

مكان يرضي كل الأذواق وتخيلوا إن عندهم سموذي سعراته 10 بس عشان تريح ضميرك ومو بس كذا يوفرون لك خيار إضافة البروتين لمشروبك عشان تطلع بفايدة وطعم ولا أروع

سجنتشر 🫐 

هذا عاد غني عن التعريف وأكثر شي ضارب عندهم فانا بيري الرهيب اللي أساسه توت أزرق مثلج مع برتقال وحتى الآيسكريم يضيفونه بالخلطة عشان يعطيك قوام كريمي وطعم يسرسح

سواء كنت طالع من النادي وتدور بروتين أو مشتهي شي فرش يبرد عليك بيوم طويل هاللستة بتختصر عليك المشوار وتقند راسك اختار اللي يجوز لك وعيش الانتعاش

تابع أفضل المقابلات والقصص المؤثرة على لوڤن شو🎥